1500નો માલ 5000 રૂપિયામાં! તમે વિદેશી બ્રાન્ડ નહીં ઝેર પી રહ્યાં છે, દારૂની 'મિની ફેક્ટરી' પકડાઈ

spurious foreign liquor : ગુજરાતમાં દારૂબંધી માત્ર કાગળ પર છે કે શું? એ સવાલ એટલા માટે થઈ રહ્યો છે કારણ કે અમદાવાદના ઠક્કરનગરમાંથી એક એવું ચોંકાવનારું કૌભાંડ સામે આવ્યું છે, જેણે પોલીસ અને દારૂના શોખીનો બંનેના હોશ ઉડાવી દીધા છે.

• બ્રાન્ડેડ બોટલમાં 'બોગસ' માલ
• 1,500નો દારૂ 5,000 રૂપિયામાં વેચવાનો ખેલ
• વિદેશી બ્રાન્ડના નામે બોગસ દારૂ
• મોતના મુખમાં ધકેલવાનું કાવતરું!
• 322 ખાલી બોટલથી નકલી દારૂનું નેટવર્ક

મોંઘી બ્રાન્ડના નામે નકલી અને સસ્તો દારૂ પધરાવવાનું એક મોટું ષડયંત્ર ચાલી રહ્યું હતું. અમદાવાદ પોલીસના ઝોન-5 LCB અને કૃષ્ણનગર પોલીસે સંયુક્ત રીતે દરોડા પાડીને ઠક્કરનગર વિસ્તારના એક મકાનમાંથી આ આખી 'મિની ફેક્ટરી'નો પર્દાફાશ કર્યો છે.

છેલ્લા બે મહિનાથી ભાડાના મકાનમાં કરાતો હતો કાળો કારોબાર

આરોપી આર્થિક લાભ મેળવવા માટે મોંઘી અને નામાંકિત વિદેશી દારૂની ખાલી બોટલો એકઠી કરતા હતા ત્યારબાદ તેમાં સસ્તો અને હલકી ગુણવત્તાનો દારૂ ભરી, અસલી સ્ટીકર અને નકલી ઢાંકણાં લગાવી ગ્રાહકોને ઊંચા ભાવે વેચી આર્થિક છેતરપિંડી આચરતા અને મોતના મુખમાં ધકેલવાનો ધંધો કરતા. છેલ્લા બે મહિનાથી ભાડાનું મકાન રાખીને આ કાળો કારોબાર ધમધમી રહ્યો હતો.

પોલીસે આ દરોડા દરમિયાન મુખ્ય સૂત્રધાર બુટલેગર હેમલ ઉર્ફે હેમુ વાઘેલાને રંગેહાથ ઝડપી પાડ્યો છે. જો કે, કૌભાંડમાં સંડોવાયેલા તેના અન્ય ત્રણ સાગરીતો ભરત સોલંકી, વિજય સોલંકી અને સુનિલ સોલંકી ભાગી છૂટવામાં સફળ રહ્યા.

47 બ્રાન્ડેન્ડ બોટલો મળી આવી

દરોડા દરમિયાન પોલીસને આ મકાનમાંથી 322 ખાલી બોટલો, 118 ક્વાર્ટર, 293 નકલી ઢાંકણાં અને દારૂ-બિયરનો જથ્થો મળી આવ્યો છે. આ સાથે 47 જેટલી અલગ-અલગ અસલી બ્રાન્ડની નકલી બોટલો સહિત પોલીસે કુલ 1.40 લાખનો મુદ્દામાલ જપ્ત કર્યો છે.

• બોટલ બ્રાન્ડેડ, 'બોગસ' માલ!
• વિદેશી બ્રાન્ડના નામે નકલી દારૂ
• મોતના મુખમાં ધકેલવાનું કાવતરું!

પકડાયેલા આરોપીની પૂછપરછમાં ખુલાસો થયો છે કે, 1,500 વાળી દારૂની બોટલનો માલ આ મોંઘી બોટલોમાં ભરીને શોખીનો પાસેથી 5,000 વસૂલવામાં આવતા હતા.

પોલીસે એક આરોપીને જેલ હવાલે કરી દીધો

તાજેતરમાં ભાવનગરમાં થયેલા લઠ્ઠાકાંડ જેવી ગંભીર ઘટનાઓ બાદ પણ બુટલેગરો સુધરવાનું નામ નથી લઈ રહ્યા. આ કૌભાંડે સાબિત કરી દીધું છે કે દારૂના શોખીનો અને વેચનારાઓ માત્ર કાયદાનો ભંગ જ નથી કરી રહ્યા, પરંતુ બ્રાન્ડના મોહમાં મોંઘા ભાવ ચૂકવીને અને વસૂલીને સ્વાસ્થ્ય સાથે પણ જીવલેણ ખેલ ખેલી રહ્યા છે. હાલ તો પોલીસે એક આરોપીને જેલહવાલે કરી, ફરાર ત્રણેય બુટલેગરોને ઝડપી પાડવા ચક્રો ગતિમાન કર્યા છે.