એક પાસે કરોડોની સંપત્તિ, બીજા પાસે પાકું ઘર પણ નથી, ગાંધીનગરમાં ભાજપના બે ઉમેદવારની અનોખી કહાની

Gandhinagar Municipal Election : ગાંધીનગર કોર્પોરેશનની ચૂંટણીમાં ભાજપના આ બે ઉમેદવાર સૌથી વધુ ચર્ચામાં છે. એક છે જેમની પાસે કરોડની સંપત્તિ છે. જ્યારે ભાજપના જ બીજા ઉમેદવાર પાસે રહેવાની સારી છત પણ નથી. એક તરફ કરોડોની સંપત્તિ ધરાવતા જશવંત પટેલ તો બીજી તરફ સામાન્ય પરિવારની ગૃહિણી લીલાબેન ચારેલ છે. બંનેની જીવનશૈલી અલગ, સંઘર્ષ અલગ પરંતુ ચૂંટણીનું મેદાન એક હવે મતદારો કોને કેટલો જનસમર્થન આપે છે. તેનો નિર્ણય ચૂંટણી પરિણામમાં થશે.

જશવંત પટેલ 250 કરોડના માલિક

ગાંધીનગર કોર્પોરેશનની ચૂંટણીમાં રાજકીય માહોલ ગરમાયો છે. વોર્ડ નંબર 11માંથી ભાજપે ફરી એકવાર જશવંત પટેલ પર વિશ્વાસ વ્યક્ત કર્યો છે. ગત ટર્મમાં સ્ટેન્ડિંગ કમિટીના ચેરમેન રહેલા જશવંત પટેલની ચૂંટણી એફિડેવિટ મુજબ 250 કરોડની સંપત્તિ છે, પરંતુ સંપત્તિની સાથે તેમની ઓળખ તેમના પરિવાર અને ગામ સાથેના જોડાણની પણ છે.

પિતા ભાટ ગામના સરપંચ રહી ચૂક્યા છે

જશવંત પટેલના જીવનમાં તેમની વયોવૃદ્ધ માતાનું પણ આગવું સ્થાન છે. ચૂંટણીના પ્રચાર વચ્ચે પણ માતા સાથે ચર્ચા અને દિવસભરની કામગીરી અંગે વાતચીત કરે છે. પરિવારમાં રાજકીય વાતાવરણ તેમને વારસામાં મળ્યું છે. તેમના પિતા ભાટ ગામના સરપંચ રહી ચૂક્યા છે એટલે રાજકારણ સાથેનું જોડાણ બાળપણથી જ રહ્યું.

રોજ સવારે પૂજા અને પરિવાર સાથે ચા-નાસ્તો કર્યા બાદ જશવંત પટેલ પ્રચાર માટે નીકળી પડે છે અને ફરી એકવાર ચૂંટણીમાં જીતનો વિશ્વાસ વ્યક્ત કરી રહ્યા છે.

લીલા ચારેલ પાસે પાકુ મકાન પણ નથી

હવે વાત કરીએ ભાજપના જ બીજા ઉમેદવારની, વોર્ડ નંબર 6માંથી લીલાબેન ચારેલ એક સામાન્ય પરિવારની ગૃહિણી છે. લીલાબેન ઝૂંપડપટ્ટી વિસ્તારમાં કાચા મકાનમાં રહે છે. પોતાના નામે પાકું મકાન નથી. તેમના પતિ નાની કરિયાણાની દુકાન ચલાવી પરિવારનું ગુજરાન ચલાવે છે.

રાજકારણના મોટા નામો વચ્ચે લીલાબેનની ઓળખ એક સામાન્ય કાર્યકર્તા તરીકે રહી છે, પરંતુ પાર્ટીએ તેમના સંગઠન સાથેના જોડાણ અને કામગીરીને ધ્યાનમાં લઈને તેમને ચૂંટણી મેદાનમાં ઉતાર્યા છે. ટિકિટ મળતા પરિવાર અને સમર્થકોમાં પણ ખુશીનો માહોલ જોવા મળ્યો.

હવે સામાન્ય પરિવારની આ મહિલા ઉમેદવાર માટે ચૂંટણી માત્ર રાજકીય મુકાબલો નથી. પરંતુ પોતાના વિસ્તારમાંથી કોર્પોરેશન સુધી પહોંચવાની તક પણ છે. લીલાબેન પણ ચૂંટણીમાં જીતનો વિશ્વાસ વ્યક્ત કરી રહ્યાં છે.