મહારાષ્ટ્રમાં ગુનો, ગુજરાતમાં ‘ધ એન્ડ’! ચોરીના દાગીના સાથે સુરતમાંથી 2 શાતિર ચોર ઝડપાયા

Crime News: ગુનો ભલે ગમે ત્યાં આચરવામાં આવ્યો હોય, પણ જો ગુનેગાર ગુજરાતમાં પગ મૂકે, તો ખાખી તેનો ખેલ ફેલ કરી જ નાખે છે. મહારાષ્ટ્રના અમરાવતી શહેરમાં આવેલ રાજાપેઠ પોલીસ સ્ટેશનની હદમાં એક મોટી ઘરફોડ ચોરીની ઘટના બની હતી. ચોરી કરીને આરોપીઓ હવામાં ગાયબ થઈ ગયા હતા. પણ તેઓ એ ભૂલી ગયા કે આગળ ગુજરાત પોલીસ ઉભી છે.

લૂંટના મુદ્દામાલ સાથે સુરત તરફ આવી રહ્યા હતા

અમરાવતીમાં હાથફેરો કરીને બે શાતિર ચોરો લૂંટના મુદ્દામાલ સાથે સુરત તરફ આવી રહ્યા હતા. બરાબર એ જ સમયે સુરતના એન્ટ્રી પોઈન્ટ એટલે કે નિયોલ ચેક પોસ્ટ ખાતે સારોલી પોલીસની ટીમ એલર્ટ મોડ પર વાહન ચેકિંગ કરી રહી હતી. પોલીસને એક ગુપ્ત અને સચોટ બાતમી મળી કે બે શંકાસ્પદ ઈસમો ચોરીના દાગીના સાથે અહીંથી પસાર થવાના છે, બસ પછી શું પોલીસે સમય બગાડ્યા વગર તુરંત જ વોચ ગોઠવી દીધી.

સારોલી પોલીસે આ આખી ઘરફોડ ચોરીનો ભેદ ઉકેલ્યો

પોલીસની ગોઠવેલી જાળમાં બંને આરોપીઓ ઝડપાઈ ગયા. સારોલી પોલીસે આ આખી ઘરફોડ ચોરીનો ભેદ ઉકેલી નાખ્યો છે. પકડાયેલા આરોપીઓના નામ અકબર ઉર્ફે આરીફ સુલતાન સૈફી અને હબીબ હફીઝ સૈફી છે. જ્યારે પોલીસે આ બંનેની તલાશી લીધી, ત્યારે તેમની પાસેથી જે મળ્યું તે જોઈને પોલીસ પણ ચોંકી ઉઠી હતી.

મહારાષ્ટ્રમાં ગુનો કરીને સુરતમાં આશરો લેવા માંગતા

આરોપીઓ પાસેથી સોના-ચાંદીના દાગીના, રોકડા રૂપિયા અને 4 મોબાઈલ ફોન મળીને કુલ રૂપિયા 77,510 રૂપિયાનો મુદ્દામાલ મળી આવ્યો. મહારાષ્ટ્રમાં ગુનો કરીને સુરતમાં આશરો લેવા માંગતા ગુનેગારોને સુરત પોલીસે જેલના સળિયા પાછળ ધકેલીને સ્પષ્ટ ચેતવણી આપી દીધી છે કે, કાયદાના હાથ બહુ લાંબા છે.

ખાખી ધારશે તો પાતાળમાંથી પણ ગુનેગારને ખેંચી લાવશે

હાલ તો સારોલી પોલીસે બંને આરોપીઓને જેલના સળિયા પાછળ ધકેલીને મહારાષ્ટ્ર પોલીસને પણ જાણ કરી દીધી છે, અને આ સપાટો બોલાવીને સુરત પોલીસે ફરી એકવાર સાબિત કર્યું છે કે ગુનો ગમે ત્યાં થાય, પણ જો ખાખી ધારશે તો પાતાળમાંથી પણ ગુનેગારને ખેંચી લાવશે.