માથામાં દેખાવા લાગ્યા છે સફેદ વાળ ? આ સુપરફુડ ખાવાનું શરુ કરો, વાળમાં વધતી સફેદી અટકી શકે

White Hair Remedies: અનિયમિત જીવનશૈલી, પોષણયુક્ત આહારનો અભાવ, સ્ટ્રેસની સીધી અસર આપણા શરીરની સાથે વાળ પર પણ પડે છે. આ સમસ્યાઓના કારણે 25 વર્ષની ઉંમર સુધીમાં માથાના વાળમાં સફેદી દેખાવા લાગે છે. નાની ઉંમરમાં વાળ સફેદ થવા એક સામાન્ય સમસ્યા બની ગઈ છે. પરંતુ આ સમસ્યાને અટકાવી શકાય છે. માથામાં દેખાતા સફેદ વાળને વધતા અટકાવવા હોય તો કેટલાક સુપર ફૂડ ખાવાનું શરૂ કરી દો.

બ્યુટી એક્સપર્ટ અનુસાર વાળનો રંગ કાળો રહેશે કે સફેદ તેનો આધાર મેલેનીન નામના પિગમેન્ટ પર હોય છે. જ્યારે શરીરમાં મેલેનીન ઘટવા લાગે છે ત્યારે વાળ કાળો રંગ ગુમાવે છે. આ સ્થિતિમાં જો લોકો પોતાની ડાયટમાં કેટલાક સુપરફૂડનો સમાવેશ કરે તો શરીરમાંથી ઘટતું મેલેનિન અટકે છે અને તેના કારણે વાળમાં વધતી સફેદીની સમસ્યા પણ અટકી શકે છે. જોકે તેનો અર્થ એ નથી કે આ વસ્તુઓ ખાવાથી માથાના વાળ ક્યારેય સફેદ ન થાય. પરંતુ નાની ઉંમરમાં મેલેનિન ઘટવાના કારણે થતી સફેદ વાળની સમસ્યાને આ ખોરાક અટકાવી શકે છે.

વાળ માટેના સુપરફૂડ

આમળા

વાળ માટેનું સૌથી પહેલું સુપરફૂડ છે આમળા. આમળા વિટામિન સી અને એન્ટિ ઓક્સિડન્ટથી ભરપૂર હોય છે. આમળામાં રહેલા પોષક તત્વ નેચરલી મેલેનિન પ્રોડક્શન વધારે છે અને વાળના મૂળને પણ મજબૂત કરે છે. આમળા કાચા પણ ખાઈ શકો છો અને તેનો જ્યુસ બનાવીને પી પણ શકો છો.

લીમડાના પાન

રસોઈમાં ઉપયોગમાં લેવાતા લીમડાના પાન પણ વાળ માટે વરદાન છે. લીમડાના પાનમાં બીટા કેરોટીન અને પ્રોટીન ભરપૂર માત્રામાં હોય છે. મીઠા લીમડાના પાન પણ વાળની સફેદ થતાં અટકાવી શકે છે. તેના માટે રોજ સવારે ખાલી પેટ ચારથી પાંચ મીઠા લીમડાના પાન ચાવીને ખાવા જોઈએ. અથવા તો નાળિયેરના તેલમાં આ પાન ઉકાળી તે તેલ વાળમાં લગાડવું.

કાળા તલ

આયુર્વેદ અનુસાર કાળા તલ વાળ માટે ફાયદાકારક છે. કળા તલ આયરન, કોપર, ઝિંક જેવા તત્વોથી ભરપૂર હોય છે અને આ પોષક તત્વો વાળનું મેલેનિન વધારવામાં મદદ કરી શકે છે. કાળા તલને તમે મુખવાસ તરીકે ડાયટમાં સામેલ કરી શકો છો. અઠવાડિયામાં બેથી ત્રણ વખત એક ચમચી શેકેલા કાળા તલ ખાવાથી વાળને પોષણ મળે છે.

ઈંડા

જો આપણા શરીરમાં વિટામિન બી12 ની ખામી હોય તો તેના કારણે પણ વાળ ઝડપથી સફેદ થઈ શકે છે. વિટામીન બી12 ની ખામી દૂર કરવી હોય તો ઈંડા તેનો સૌથી સારો સોર્સ છે. જો તમે ઈંડા ખાતા હોય તો રોજ એક બાફેલું ઈંડુ ખાવાનું શરૂ કરો તેનાથી વાળને પોષણ મળશે અને વાળ સફેદ થતા અટકશે.

પાલક

જ્યારે આપણા શરીરમાં ફોલિક એસિડ ઓછું હોય ત્યારે પણ વાળ ઝડપથી સફેદ થવા લાગે છે. ફોલિક એસિડનો સૌથી સારો સોર્સ પાલકની ભાજી છે. પાલકની ભાજી ખાવાથી શરીરને આયરન, ફોલેટ વિટામિન મળે છે. તેનાથી વાળને પોષણ મળે છે અને વાળના મૂળ મજબૂત થાય છે. પોષક તત્વો વાળનો રંગ કાળો રહે તે કામમાં મદદ કરી શકે છે.

વાળને સફેદ થતા અટકાવવા માટે આહારમાં આ પોષક તત્વો સામેલ કરવાની સાથે પૂરતા પ્રમાણમાં પાણી પીવું અને પૂરતી ઊંઘ કરવી પણ જરૂરી છે. સ્ટ્રેસ અને અપૂરતી ઊંઘ ના કારણે પણ વાળ પર ખરાબ અસર પડે છે.

(Disclaimer: અહીં આપેલી માહિતી અને ઘરગથ્થુ ઉપચાર સામાન્ય માહિતી પર આધારિત છે. તેને અપનાવતા પહેલા તબીબી સલાહ લેવી જોઈએ. ZEE24kalak તેની પુષ્ટિ કરતું નથી.)