અમેરિકામાં કામ કરતા ગુજરાતીઓ સાવધાન! H1B વિઝા અંગે થયેલા આ 5 ફેરફાર ખાસ જાણો

એક્સ્ટેન્શન પર 4000 ડોલર ફી વધી

H-1B વિઝા એક્સ્ટેન્શન અને અમેડમેન્ટ પિટીશન ઉપર પણ હવે 4000 ડોલરની ફી આપવી પડશે. પહેલા ફક્ત શરૂઆતી ફાઈલિંગ અને કંપની બદલવાના સમયે જ આ ફી ચૂકવવી પડતી હતી. આ ફેરફારની અસર એવી કંપનીઓ પર ડશે જ્યાં 50થી વધુ કર્મચારીઓ હોય અને જેમની અડધાથી વધુ વર્કફોર્સ પાસે H-1B સ્ટેટસ હોય. જો કે આ વિઝા ફી કંપની ચૂકવતી હોય છે પરંતુ કંપની પોતાના પર ભાર પડતા આ કેટેગરી હેઠળ ઓછા લોકોની ભરતી કરે તેવો પણ ડર છે.

પગાર આધારિત H-1B લોટરી સિસ્ટમ

2027 સીઝન માટે H-1B કેપ સિલેક્શન સિસ્ટમ હવે ડિપાર્ટમેન્ટ ઓફ લેબરના OEWS પગાર સ્તરો પર આધારિત છે. જે વ્યક્તિનો પગાર વધુ હશે તેને લોટરીમાં વધુ એન્ટ્રી મળશે. જેમ કે લેવલ 1 ને 1 એન્ટ્રી મળે. જ્યારે લેવલ 4ને 4 એન્ટ્રી મળે. ઓછા પગારવાળા વ્યક્તિને લોટરીમાંથી હટાવી ન શકાય પરંતુ તેમની એન્ટ્રી ઓછી હોય છે.

તપાસ વધુ કડક અને કોઈ ઓટોમેટિક RFE નહીં

USCIS ની પોલીસીમાં થયેલા ફેરફારની તપાસ કરનારા અધિકારીઓને હવે એ અધિકાર મળેલો છે કે જો જરૂરી પુરાવા ન હોય તો તેઓ રિક્વેસ્ટ ફોર એવિડન્સ (RFE) કે નોટિસ ઓફ ઈન્ટેન્ટ ટુ ડિનાય (NOID) વગર જ સીધા H-1B અરજીઓને નામંજૂર કરી શકે છે. શરૂઆતી ફાઈલિંગ ખુબ જ સાવધાનીપૂર્વક થવું જોઈએ. હવે અરજકર્તા દસ્તાવેજો કે ફોર્મના વર્ઝનમાં થયેલી ભૂલને સુધારવા માટે RFEને બીજી તક તરીકે નહીં ગણી શકે.

નોકરી બદલવા કે થર્ડ પાર્ટી પ્લેસમેન્ટ માટે સાવધાની

કંપની બદલી શકાય છે પરંતુ ટ્રાન્સફરની અરજી આપ્યા બાદ અને મંજૂરી મળતા પહેલાના સમયે (પેન્ડેન્સી પીરિયડ)માં વધુ ઝીણવટભરી તપાસ કરવામાં આવે છે. કર્મચારીઓએ પોતાના સ્ટેટસનો રેકોર્ડ સ્વચ્છ રાખવો જોઈએ. ટ્રાન્સફરની પ્રક્રિયા ચાલુ હોય તો વિદેશ મુસાફરીથી બચવું જોઈએ અને નક્કી કરવું જોઈએ કે તમામ થર્ડ પાર્ટી ક્લાયન્ટની જાણકારી (નોકરીની જવાબદારીઓ, પગાર, કામની જગ્યા વગેરે) અરજીમાં અપાયેલી જાણકારીઓ સાથે મેળ ખાતી હોય.

ઈન્ટરનેશનલ ટ્રાવેલ અને સોશિયલ મીડિયાની તપાસ

સ્ટેટ ડિપાર્ટમેન્ટ હવે H-1B અને H-4 વિઝા માટે અરજી કરનારાઓની ઓનલાઈન હાજરી કેવી છે તેની પણ તપાસ કરશે. જે અંતર્ગત સ્ક્રીનિંગ માટે તેમના પબ્લિક સોશિયલ મીડિયા પ્રોફાઈલની પણ તપાસ થઈ શકે છે. અમેરિકામાં કામ કરનારાઓ માટે એવી સલાહ છે કે તેઓ વિદેશ મુસાફરી કરતા પહેલા પોતાના I-94 ની એક્સપ્યરી ડેટ અને વિઝા સ્ટેમ્પની વેલિડિટી જરૂર ચેક કરે. તથા જ્યાં સુધી એમ્પ્લોયર ટ્રાન્સફર કે વિઝા એક્સ્ટેન્શનની પ્રક્રિયા ચાલુ હોય ત્યાં સુધી વિદેશ મુસાફરીથી બચે.