 "વેસ્ટ ઈન્ડિઝે રચ્યો ઈતિહાસ, વનડેમાં પ્રથમવાર 400 પાર, ભારતીય બોલરોને ધોઈ નાખ્યા")
Ind vs WI 2nd ODI : ભારત અને વેસ્ટ ઈન્ડિઝ વચ્ચેની બીજી વનડે મેચ આજે ગુવાહાટીના બારસાપારા ક્રિકેટ સ્ટેડિયમમાં રમાઈ રહી છે. આ મેચમાં પ્રથમ બેટિંગ કરતા વેસ્ટ ઈન્ડિઝે વનડે ક્રિકેટના ઈતિહાસમાં પ્રથમવખત 400 રનનો આંકડો પાર કર્યો છે. ભારતને 406 રનનો ટાર્ગેટ આપ્યો છે. જો ભારતીય ટીમ આજે આટલો મોટો સ્કોર સફળતાપૂર્વક હાંસલ કરી લેશે, તો તે એક રેકોર્ડ બની જશે, કારણ કે ટીમે અગાઉ ક્યારેય આટલો મોટો ટાર્ગેટ ચેઝ કર્યો નથી.
ત્રણ બેટ્સમેનોની સદી
આ મેચમાં પ્રથમ બેટિંગ કરતા વેસ્ટ ઈન્ડિઝે શાનદાર બેટિંગનું પ્રદર્શન કર્યું હતું. વેસ્ટ ઈન્ડિઝના જોન કેમ્પબેલ, શાઈ હોપ અને અમીર જાંગૂએ આ મેચમાં સદી ફટકારી હતી. કીસી કાર્ટી 9 રન બનાવીને આઉટ થયા બાદ જોન કેમ્પબેલ અને શાઈ હોપે બીજી વિકેટ માટે 110 રનની શાનદાર ભાગીદારી નોંધાવી હતી. 147 રનના સ્કોર પર વેસ્ટ ઈન્ડિઝને બીજો ઝટકો લાગ્યો હતો. જ્યારે 65 બોલમાં સદી પૂરી કરનાર કેમ્પબેલ આખરે 68 બોલમાં 101 રન બનાવીને આઉટ થયો હતો.
અમીર જાંગૂ અને શાઈ હોપ વચ્ચે 182 રનની ભાગીદારી
ત્યારબાદ અમીર જાંગૂ અને શાઈ હોપ બંનેએ સદી ફટકારી હતી. આ જોડીએ 182 રનની ભાગીદારી કરી હતી. કેપ્ટન શાઈ હોપે 94 બોલમાં 104 રનની ઇનિંગ્સ રમી હતી. જોકે, સદી પૂરી કર્યા બાદ તરત જ કુલદીપ યાદવના બોલ પર આકિબ નબીએ તેનો કેચ પકડ્યો હતો. થોડીવાર પછી અમીર જાંગૂએ પણ 70 બોલમાં પોતાની સદી પૂરી કરી હતી.
હોપના આઉટ થયા બાદ મેદાનમાં આવેલા શેરફેન રધરફોર્ડ પહેલા જ બોલ પર આઉટ થયો હતો. જાંગૂ પાસેથી લાંબી ઇનિંગ્સની અપેક્ષા હતી પરંતુ તે 77 બોલમાં 114 રન બનાવીને રવિન્દ્ર જાડેજાનો શિકાર બન્યો હતો. જાડેજાના બોલ પર ઋતુરાજ ગાયકવાડે તેનો કેચ પકડ્યો હતો.
આકિબને ડેબ્યૂ મેચમાં ના મળી એકપણ વિકેટ
ભારત તરફથી કુલદીપ, રવિન્દ્ર જાડેજા અને ગુરનૂર બ્રારે બે-બે વિકેટ ઝડપી હતી, જ્યારે પ્રસિદ્ધ કૃષ્ણાએ એક વિકેટ લીધી હતી. આકિબ નબીને આ મેચમાં વનડેમાં ડેબ્યૂ કરવાની તક મળી હતી, પરંતુ તે એકપણ વિકેટ લઈ શક્યો નહોતો.
)