"યે મેરા નંબર...મુજે કોલ કરના બાત કરની હૈ", રામોલ પોલીસે સગીરાના છેડતી કેસમાં વિધર્મી આરોપીની ધરપકડ

ઉદય રંજન/અમદાવાદ: વર્તમાન સમય માં સમાજમાં દીકરીઓની સુરક્ષાને લઈને વાલીઓની ચિંતા વધારતો એક કિસ્સો અમદાવાદના રામોલ વિસ્તારમાંથી સામે આવ્યો છે. અહીં એક વિધર્મી યુવક છેલ્લા પાંચ દિવસથી એક ૧૬ વર્ષની માસૂમ વિદ્યાર્થિનીનો રસ્તામાં પીછો કરી રહ્યો હતો અને છેડતી કરતો હતો. સદનસીબે, દીકરીએ ડરવાને બદલે તેના માતા-પિતાને જાણ કરી અને માતા-પિતાએ ફિલ્મી સ્ટાઈલમાં વોચ ગોઠવીને આ રોમિયોને ઝડપી પાડ્યો. રામોલ પોલીસે આ શખ્સ સામે POCSO હેઠળ સખત કાર્યવાહી શરૂ કરી છે.

અમદાવાદના રામોલ વિસ્તારમાં રહેતી અને 10. મા ધોરણમાં અભ્યાસ કરતી એક 16 વર્ષીય સગીરા રોજ ઘરેથી શાળાએ જતી હતી ત્યારે છેલ્લા 5 દિવસથી સમીર શેખ નામનો એક વિધર્મી શખ્સ એક્ટિવા લઈને આ સગીરાનો પીછો કરતો હતો. શાળાએ જતા સમયે અને છૂટતા સમયે તે સગીરાની આસપાસ જ ફરતો રહેતો. એટલું જ નહીં, આરોપી સમીર શેખ વારંવાર સગીરા પાસે જઈને પોતાનો મોબાઈલ નંબર આપી, વાત કરવા માટે સતત દબાણ કરતો હતો અને છેડતી કરતો હતો શરૂઆતમાં સગીરા ડરી ગયેલી હોવા ના કારણે સગીરાએ પરિવાર ને વાત ન કરી હતી પણ આ સિલસિલો ચાલુ રહેતા સગીરા એ હિંમત ભેગી કરી અને આ આખી હકીકત તેના માતા-પિતાને જણાવી દીધી હતી.

સગીર દીકરીની આ વાત સાંભળીને માતા-પિતા ચોંકી ઉઠ્યા. પરંતુ ગુસ્સા પર કાબૂ રાખી તેમણે સમજદારીથી કામ લીધું અને વાલીઓએ શાળા છૂટવાના સમયે શાળા ના રસ્તા પર વોચ ગોઠવી હતી ત્યારે જ દીકરી બહાર આવી ત્યારે તેને પરેશાન કરવા પહોંચેલા સમીર શેખને સગીરાએ માતા-પિતાને બતાવ્યો. માતા-પિતાએ તરત જ ત્યાં જઈને આ રોમિયોને રંગેહાથ પકડી લીધો અને તાત્કાલિક રામોલ પોલીસને જાણ કરી દીધી. રામોલ પોલીસ પણ ગણતરીની મિનિટોમાં ત્યાં પહોંચી ગઈ અને આરોપી સમીર શેખની અટકાયત કરી લીધી હતી

રામોલ પોલીસ સ્ટેશન લાવીને જ્યારે સમીર શેખની સઘન પૂછપરછ કરવામાં આવી, ત્યારે કેટલીક ચોંકાવનારી વિગતો સામે આવી. આરોપી સમીર શેખ પરિણીત છે, તેમ છતાં તે એક 16 વર્ષની માસૂમ સગીરાનો પીછો કરતો હતો. વધુ તપાસમાં જાણવા મળ્યું છે કે તે છેલ્લા 6 મહિનાથી બ્લિંકિટ ડિલિવરી બોય તરીકે નોકરી કરતો હતો અને કામના ના કારણે શાળા ના રસ્તે આરોપી સમીર શેખ નું ગોડાઉન આવતું હોવાથી સગીરા પર નજર પડી હતી અને પીછો કરવાનું શરૂ કર્યું હતું.

ત્યારે રામોલ પોલીસે સમીર શેખની ધરપકડ કરીને રામોલ પોલીસે હાલ સગીરાનું નિવેદન નોંધીને આરોપી સમીર શેખ વિરુદ્ધ છેડતી અને POCSO એક્ટ હેઠળ કડક ગુનો દાખલ કર્યો છે અને તેને જેલ હવાલે કરવાની તજવીજ હાથ ધરી છે. આ ઘટના એ તમામ વાલીઓ માટે મોટો સંદેશ છે કે પોતાના બાળકો, ખાસ કરીને દીકરીઓ સાથે મિત્રતાભર્યો વ્યવહાર રાખો, જેથી તેઓ કોઈપણ તકલીફ વિના સંકોચ તમને જણાવી શકે.