 "અમદાવાદીઓને મોંઘવારીનો વધુ એક ડામ: હવે એરપોર્ટ પર કોઈને મુકવા કે લેવા જવું પણ મોઘું પડશે, જાણો નવો ડ્રોપ અને પિક-અપ ચાર્જ")
Ahmedabad Airport Commercial Taxi Pickup Drop Charges: અમદાવાદ ઈન્ટરનેશનલ એરપોર્ટ પર મુસાફરોને મૂકવા અને લેવાનું હવે મોંઘું બની રહ્યું છે. અમદાવાદના સરદાર વલ્લભભાઈ પટેલ ઈન્ટરનેશનલ એરપોર્ટ પર કોમર્શિયલ વાહનો માટે 1 ઓક્ટોબરથી નવા ભાવ જાહેર કરી દેવામાં આવ્યા છે. અમદાવાદ એરપોર્ટ પર વિવિધ સુવિધાઓ વધારવાના નામે આ ચાર્જ વસૂલવાનો નિર્ણય લેવાયો છે. નવા નિયમ અનુસાર હવે એરપોર્ટ પર પ્રવાસીઓને પીકઅપ અને ડ્રોપ કરવા માટે વધારાની રકમ ચૂકવવી પડશે, જેનો સીધો જ આર્થિક બોજ મુસાફરોના ખિસ્સા પર પડશે.
અમદાવાદ એરપોર્ટ પર નવા પાર્કિંગ અને પીકઅપ-ડ્રોપઓફનો શું છે ચાર્જ?
અમદાવાદ એરપોર્ટ પર નવા જાહેર કરાયેલા ભાવ મુજબ, આ નિયમ મુખ્યત્વે પીળી નંબર પ્લેટ ધરાવતા તમામ કોમર્શિયલ વાહનોને લાગુ પડશે. ટર્મિનલ-1 ના ડિપાર્ચર ખાતે મુસાફરોને ડ્રોપ કરવા માટે પ્રતિ વિઝિટ રૂ. 50 રૂપિયા ચાર્જ વસૂલાશે. જ્યારે એરાઇવલ પર મુસાફરોને પીકઅપ કરવા માટે પ્રથમ 8 મિનિટ માટે રૂ. 200 ચાર્જ નક્કી કરવામાં આવ્યો છે.
મુસાફરો પાસેથી આ રકમ અલગથી વસૂલવામાં આવે તેવી પૂરેપૂરી શક્યતા
અમદાવાદ એરપોર્ટ પર આ નવા ભાવના કારણે ટેક્સી અને કેબ સેવા કંપનીઓના ખર્ચમાં લીધો વધારો નોંધાશે, જેની અસર હવે ગ્રાહકોને પડવાની છે. અત્યાર સુધી ગ્રાહક એપમાંથી ટેક્સી કે કેબ બુક કરાવે ત્યારે આ વધારાનો ચાર્જ સમાવવામાં આવ્યો નથી. પરંતુ ડ્રાઇવરો દ્વારા મુસાફરો પાસેથી હવે આ રકમ અલગથી વસૂલવામાં આવે તેવી પૂરેપૂરી શક્યતા દેખાઈ રહી છે. મુસાફરો પાસેથી આ રકમ કેવી રીતે અને કોણે વસૂલવી તે અંગે અમદાવાદ એરપોર્ટના સત્તાવાર ટેરિફમાં કોઈ સ્પષ્ટ માર્ગદર્શિકા આપવામાં આવી નથી, જેને કારણે આગામી દિવસોમાં મુસાફરો અને ડ્રાઇવરો વચ્ચે કચવાટ ઊભો થવાની શક્યતા છે.
કોમર્શિયલ ટેક્સીઓ માટેના પાર્કિંગ વિસ્તારમાં પણ ફેરફાર
અમદાવાદ એરપોર્ટ પર નવા ચાર્જ લાગુ કરવા માટે એરપોર્ટ પ્રશાસન દ્વારા કોમર્શિયલ ટેક્સીઓ માટે જે અત્યાર સુધી પાર્કિંગ વિસ્તાર હતો, એમાં પણ ફેરફાર કરવામાં આવ્યો છે. અગાઉ ટેક્સીઓ માટે ટર્મિનલ-2 (T2) નજીકના વિસ્તારનો ઉપયોગ કરવામાં આવતો હતો. પરંતુ નવા નિયમ હેઠળ હવે કોમર્શિયલ ટેક્સીઓએ એરપોર્ટ સર્કલ પાસે આવેલી 'હોટેલ ઉમ્મેદ' નજીકના વિસ્તારનો પાર્કિંગ માટે ઉપયોગ કરવાનો રહેશે.
)