23 વર્ષની પરંપરા તૂટી! અમદાવાદ GMDC ગ્રાઉન્ડમાં મફત ગરબાનો યુગ પૂરો, આપવા પડશે PASSના રૂપિયા, જાણો ટિકિટના દર

Ahmedabad News: GMDC મેદાનમાં આ વર્ષે યોજાનારી વાઇબ્રન્ટ નવરાત્રિમાં ૨૩ વર્ષ બાદ પ્રથમ વખત પ્રવેશ માટે ચાર્જ નક્કી કરવામાં આવ્યો છે. અગાઉ સામાન્ય લોકો માટે આ સરકારી ગરબા મહોત્સવ બિલકુલ નિઃશુલ્ક રહેતો હતો, પરંતુ હવે એન્ટ્રી પાસ ખરીદવો પડશે.

જોકે, નવરાત્રિના પ્રથમ નોરતે પ્રવેશ સાવ મફત રાખવામાં આવ્યો છે. બીજા નોરતાથી લઈને નવમા નોરતા સુધી ગરબા રસિકોએ ₹૧૦૦ થી લઈને 3000 રૂપિયા સુધીની કિંમતના ઓનલાઈન પાસ ખરીદવાના રહેશે, જેનું બુકિંગ ખાનગી એપ પર શરૂ થઈ ગયું છે. આ માટે GMDC ગ્રાઉન્ડને બે ઝોનમાં વહેંચવામાં આવ્યું છે, જેમાં સેલિબ્રેશન ઝોન અને સ્ટેજની નજીક આવેલો પ્રિમિયમ એક્સપિરિયન્સ ઝોન સામેલ છે.  

વ્યક્તિગત એન્ટ્રી માટે સેલિબ્રેશન ઝોનમાં 2 થી 5 નોરતા માટે 100 અને 6 થી 9 નોરતા માટે ₹૨૫૦ ચાર્જ રહેશે. જ્યારે પ્રિમિયમ ઝોનમાં વ્યક્તિગત એન્ટ્રી માટે 2 થી 5 નોરતા માટે 200 અને 6 થી 9 નોરતા માટે 500 ચૂકવવા પડશે. ગ્રુપ બુકિંગ કરાવવા માંગતા લોકો માટે સેલિબ્રેશન ઝોનમાં 2 થી 5 નોરતા દરમિયાન 300 થી 600 અને 6 થી 9 નોરતા દરમિયાન 750 થી 1500 સુધીના ગ્રુપ પાસ મળશે.

પ્રિમિયમ ઝોનમાં ગ્રુપ પાસના દર 2 થી 5 નોરતા માટે 600 થી 1200 અને 6 થી 9 નોરતા માટે 1500 થી 3000 સુધીના રહેશે. આ વર્ષે ગરબા મહોત્સવનો સમય સાંજે 5 વાગ્યાથી રાત્રે 12 વાગ્યા સુધી પારંપરિક અને અર્વાચીન ગરબાનો રહેશે. ત્યારબાદ મોડી રાત્રે સવારે 4 વાગ્યા સુધી દેશી ઢોલના તાલે પરંપરાગત મંડળી ગરબાનું આયોજન કરવામાં આવશે, એટલે કે ગરબા રાત્રે 4 વાગ્યા સુધી ચાલશે.