ધરતીપુત્રોની હાલત કફોડી! ક્યાંક વરસાદની અછત, તો ક્યાંક પાછોતરા વરસાદથી પાકને નુકસાન

Gujarat Farmers : ગુજરાતમાં ક્યાંક વરસાદની અછતના કારણે ઉભો પાક સુકાઈ રહ્યો છે. તો ક્યાંક પાછોતરા વરસાદથી તૈયાર પાક બગડી ગયો છે. ખાતર, બિયારણ, દવા અને મજૂરી તેમજ વાવણી પાછળ કરેલો ખર્ચ પણ આ વર્ષે ખેડૂતોને મળે તેમ નથી. જેના કારણે ધરતીપુત્રોની હાલત દયનીય બની છે.

કપાસના ખેતરો કાળા પડી ગયા

બોટાદ જિલ્લામાં પાછોતરા વરસાદ બાદ કપાસના ખેતરો કાળા પડી ગયા છે. ખેતરમાં ઉભેલો કપાસનો છોડ સુકાઈને કાળો પડતા ખેડૂતોને પાક સંપૂર્ણ નિષ્ફળ જવાની ચિંતા સતાવી રહી છે. ખેડૂતોએ ખેતરમાં પાક નહીં, આખા વર્ષની આશા વાવી હતી, પરંતુ આ આશાઓ હવે આંખ સામે કરમાઈ રહી છે.

અમરેલી જિલ્લામાં વરસાદ ખેંચાતા બિનપિયત ખેતરોમાં કપાસ અને મગફળીના પાક સુકાવા લાગ્યા છે. જે વીઘામાં 20 મણ કપાસની આશા હતી, ત્યાં હવે માત્ર 5થી 6 મણ ઉત્પાદનની ભીતિ છે. પાક ઘટ્યો એટલે આવક ઘટી, પરંતુ ખેતીનો ખર્ચ તો એટલો જ રહ્યો.

સાબરકાંઠામાં ઓછા વરસાદે ખેડૂતોનું ખેતીનું આખું ગણિત ખોરવી નાખ્યું છે. મગફળીના પાકને સમયસર પાણી ન મળતા ઉત્પાદનમાં મોટો ઘટાડો થયો છે. મોંઘા બિયારણ, ખાતર, દવા અને મજૂરીનો ખર્ચ કાઢવો પણ હવે મુશ્કેલ બન્યો છે.

ખેડૂતના ખેતરોમાં આ વખતે કુદરતનો બેવડો પ્રહાર

રાજકોટ જિલ્લાના જસદણમાં પહેલા વરસાદની અછત અને ત્યાર બાદ પાછોતરા વરસાદે ખેડૂતોને મુશ્કેલી વધારી દીધી છે. કેમ કે, મગફળીમાં રોગચાળો આવતા લીલો પાક ઉખાડવાની ખેડૂતોને ફરજ પડી છે.

બીજી તરફ પાટણ જિલ્લાના ખેડૂતોના ખેતરો હરિયાળા નહીં, પરંતુ સકાઈ રહ્યા છે. વરસાદની લાંબી ખેંચથી કપાસ, બાજરી અને કઠોળ સહિતના પાક સામે નુકસાનનું સંકટ ઊભું થયું છે. ત્યારે બિયારણ, ખાતર અને દવા માટે લીધેલા નાણાં હવે કેવી રીતે ચૂકવવા તે સવાલ છે. ત્યારે પાટણ જિલ્લાના ખેડૂતોની માંગ છે કે, તાત્કાલિક દુષ્કાળગ્રસ્ત જાહેર કરવામાં આવે અને ખેડૂતોને સહાય આપવામાં આવે.

ખેડૂતના ખેતરમાં આ વખતે કુદરતના બેવડા પ્રહારની અસર જોવા મળી રહી છે. ક્યાંક પાક સુકાઈ રહ્યો છે, તો ક્યાંક તૈયાર પાક બગડી રહ્યો છે. ખેતીનો ખર્ચ, ઘટતું ઉત્પાદન અને માથે ચડતું દેવું-ખેડૂત સામે પડકારોનો પહાડ છે. ત્યારે હવે ખેડૂતોની માંગ છે કે, સરકાર તાત્કાલિક સર્વે કરાવે, યોગ્ય વળતર આપે અને રાહત પેકેજ જાહેર કરી અન્નદાતાને આ સંકટમાંથી ઉગારે.